Студентите на Факултетот за образовни науки, заедно со своите професори, традиционално се организатори на предновогодишниот настан за најмладите кој се одржува во Универзитетот Гоце Делчев.

Годинава станува збор за претстава работена од студентите на ФОН под менторство на проф. д-р Даниела Коцева.

„Со голема радост денес ја продолжуваме долгогодишна традиција на Факултетот за образовни науки  и Универзитетот " Гоце Делчев" за доделување новогодишни пакетчиња на децата на вработените. Оваа иницијатива е многу повеќе од празнична активност. Како Универзитет се стремиме не само кон академски успеси, туку како општествена одговорна институција се грижиме за сите членови на заедницата па и за најмалите.

Сите честитки и пофалби оваа година одат за студентите од Факултетот за образовни науки кои со голема посветеност и креативност  подготвија прекрасна новогодишна претстава под наслов 'Дедо Мраз и неговите ѕвездички', покажувајќи како образованието може да биде катализатор за создавање радост и заедништво. Ова е доказ дека нашите студенти, преку практичната примена на своите знаења, умеења, вештини, компетенции потврдија дека се подготвени да станат лидери и носители на промени во општеството.  

Благодарност до сите колеги и студенти кои ја подржаа оваа иницијатива. Посебно до ректорот на Универзитетот "Гоце Делчев", проф. д-р Дејан Мираковски и деканот на Факултетот за образовни науки проф.  д-р Емилија Петрова Ѓорѓева. Како институција се надевам ќе продолжиме да ја негуваме оваа традиција и уште повеќе ќе вложуваме во активности што промовираат хуманост, солидарност и општествена одговорност, изјави проф. Д-р Коцева.

Среќни празници, исполнети со љубов, среќа и успех!“